Deskrizzjoni tal-istruttura tad-dipartiment
Id-Dipartiment tal-Awditjar Intern u Investigazzjonijiet (IAID) għandu l-għan li jipprovdi lill-Gvern ta’ Malta b’funzjoni ta’ assessjar, konsultazzjoni u investigazzjoni funzjonalment indipendenti u professjonali fi ħdan il-Gvern biex jeżamina, jevalwa, jistħharreġ, jiskrutinizza u jagħmel rakkomandazzjonijiet dwar attivitajiet governattivi, bħala servizz lill-Gvern innifsu. L-Att dwar l-Awditjar Intern u Investiazzjonijiet Finanzjarji, Kap 461 tal-Liġijiet ta’ Malta, jipprovdi dwar ir-regolamentazzjoni tal-funzjoni ta’ awditjar intern u tal-funzjoni ta’ stħarriġ finanzjarju, li jinkludi sġ-setgħa li jsir awditjar intern u stħarriġ finanzjarju indipendenti u effettiv, u biex jipprovdi dwar is-salvagwardji meħtieġa sabiex jiġi żgurat il-ħarsien tal-interessi finanzjarji tal-Gvern li jinkludu l-fondi li jista’ jirċievi jew ikun meħtieġ li jamministra taħt l-obbligi internazzjonali ta’ Malta. L-għan ewlieni tal-IAID hu li jassisti lis-Segretarji Permanenti fil-qadi effettiv ta’ dmirijiethom. L-IAID jipprovdi lis-Segretarji Permanenti b’analiżi, rakkomandazzjonijiet, pariri u informazzjoni dwar attivitajiet riveduti. L-IAID huwa indipendenti mill-attivitajiet li jivverifika biex jiżgura ġudizzju oġġettiv essenzjali biex jagħti pariri imparzjali lill-Gvern. L-ebda membru tal-IAID ma għandu jkollu awtorita’ fuq, jew responsabbilta’ għal, kwalunkwe mill-attivitajiet riveduti. L-involviment tad-Dipartiment fl-iżvilupp jew l-implimentazzjoni ta’ politika, sistemi u proċeduri dipartimentali għandu jkun f’kapaċita’ ta’ konsulenza, b’konformita’ ma’ kwalunkwe rakkomandazzjoni tal-passat u/jew preżenti magħmula mill-IAID stess.
Deskrizzjoni tal-funzjonijiet u r-responsabbiltajiet
L-IAID jipprovdi s-servizzi tiegħu permezz tal-erba’ Direttorati li ġejjin: id-Direttorat tal-Awditjar intern u l-Immaniġġjar tar-Riskju, id-Direttorat Ċentrali ta’ Armonizzazzjoni; id-Direttorat tal-Investigazzjonijiet Finanzjarji u d-Direttorat tal-Verifiki tal-Fondi tal-UE. L-IAID huwa impenjat bis-sħiħ li jassisti lill-Gvern Malti biex jagħmel l-aħjar użu mill-fondi pubbliċi sabiex jinkisbu r-riżultati li bi dritt iċ-ċittadini Maltin u tal-UE jistennew li jaraw.
Deskrizzjoni ġenerali tal-kategoriji ta’ dokumenti (inklużi dokumenti eżenti)
Id-dokumenti miżmum fl-IAID huma relatati ma’ verifiki, investigazzjonijiet, verifiki ta’ fondi ewropej u ma’ xogħol ta’ natura amministrattiva.
Deskrizzjoni tal-manwali kollha u tipi simili ta’ dokumenti li fihom politiki, prinċipji, regoli jew linji gwida li skonthom isiru deċiżjonijiet jew rakkomandazzjonijiet fir-rigward tal-membri tal-pubbliku
Id-dokumenti fl-IAID huma trattati skont il-Kapitlu 461tal-Liġijiet ta’ Malta, l-Att dwar l-Awditjar Intern u Investigazzjonijiet Finanzjarji.
Ħolqa għall-Kaptilu 461 tal-Liġijiet ta’ Malta:
https://legislation.mt/eli/cap/461/20191001/mlt